Qytetarët maqedonas sërish në shesh kundër vendimit të Ivanov

21:59 | 15 Prill 2016

Për të pestën ditë me radhë, qindra qytetarë maqedonas kanë zbarkuar në sheshin qëndror të Shkupit kundër amnistisë së Ivanov për zyrtarët e lartë.

Mbledhja e protestuesve ka nisur prej orës 18:00, fillimisht para Prokurorisë Speciale Publike.

Më pas ata janë zhvendosur para Kuvendit. Në shesh ka prani të shtuar policore.

Shumë qytetarë u bien bilbilave, ndërsa mbajnë në duar flamuj dhe parulla. Dëgjohen thirrje : “Jep dorëheqjen Ivanov!” dhe “ Mbështetje Prokurorisë Speciale Publike”.

Kërkesat mbeten të njëjta. Përveç dorëheqjes së Ivanov, ata kërkojnë edhe fillimin e një proçesi për zgjedhjen e një qeverie teknike e cila do të hapë rrugën për zgjedhje të lira dhe të besueshme dhe në të njëjtën kohë për pezullimin e procesit të filluar të shpalljes së zgjedhjeve parlamentare më 5 qershor.

Katër ditë më parë, Presidenti maqedonas shpalli vendimin e tij për pushimin e hetimeve për 56 persona, kryesisht zyrtarë dhe ndihmës të tyre lidhur me skandalin e përgjimeve.

Amnisitinë e tij, Ivanov e argumentoi si një përpjekje për t’i dhënë fund krizës politike.