Kryeqyteti po përgatit një atmosferë verore me muzikë dhe kulturë në lagje të ndryshme të Prishtinës, përmes programit “n’Lagje”, i cili nis më 5 gusht.

Nënkryetarja e Kryeqytetit, Besiane Musmurati, ka bërë të ditur se gjatë gjithë muajit gusht qytetarët do të kenë mundësi të ndjekin koncerte me muzikë live, duke e sjellë skenën kulturore më afër komuniteteve.

Programi synon që hapësirat publike të lagjeve të shndërrohen në vende takimi, ku muzika, kultura dhe atmosfera verore bashkohen për qytetarët e Prishtinës.

Koncertet do të mbahen në lagjet Dardani, Muharrem Fejza, Muhaxherë, Ulpianë, Hajvali, Kolovicë, Breg të Diellit, Kodra e Trimave, Matiqan dhe Kalabri, duke filluar çdo mbrëmje nga ora 20:00.

Në kuadër të programit do të performojnë artistët Nita Latifi, Offchestra, Florent Abrashi dhe String String.

Koncerti i parë do të mbahet më 5 gusht në lagjen Dardani, në hapësirën Mbi Kurriz, duke filluar nga ora 20:00.

Musmurati ka thënë se qëllimi i këtij programi është që kultura të mos mbetet vetëm në qendër të qytetit, por të jetë e pranishme edhe në lagjet ku jetojnë qytetarët.

Programi “n’Lagje” organizohet nga Drejtoria e Kulturës e Kryeqytetit dhe është pjesë e aktiviteteve verore që synojnë aktivizimin e hapësirave publike dhe pasurimin e jetës kulturore në Prishtinë. /Lajmi.net/