Një zjarr fushor ka shpërthyer në fshatin Gregjenik të komunës së Kamenicës, duke shkaktuar rrezik për zonën përreth dhe lëndimin e një zyrtari policor.

Ngjarja ka ndodhur të shtunën rreth orës 13:17, kur policia dhe njësitë përkatëse janë angazhuar në përpjekje për të shuar zjarrin që kishte përfshirë një sipërfaqe fushe.

Sipas Policisë së Kosovës, në vendin e ngjarjes kanë intervenuar njësitë zjarrfikëse, të cilat kanë arritur të lokalizojnë dhe neutralizojnë flakët, duke parandaluar përhapjen e mëtejshme.

Polici i lënduar është trajtuar fillimisht në vendin e ngjarjes, më pas është dërguar për trajtim të mëtejshëm në Qendrën Klinike Universitare të Kosovës (QKUK) në Prishtinë.

Rasti është cilësuar si “Shkaktim i rrezikut të përgjithshëm – zjarr” dhe është nën hetim nga autoritetet përkatëse.