Trajneri i xhudos, Driton Kuka duke komentuar lajmin e mrekullueshëm nga Kampionati Evropian i juniorëve, ku xhudisti Dardan Cena arriti ta fitojë medaljen e bronztë në kategorinë deri në 73 kilogramë, ka thënë se fabrika e medaljeve nuk po ndalet.

Ai thotë se dhurata më e mirë për ditëlindjen e tij ishte nga Praga, ku edhe po mbahet Kampionati Evropian U21, transmeton lajmi.net.

“Fabrika e medaljeve nuk po ndalet. Dardan Cena i mrekullueshëm, edhe një medalje për Kosovën në Kampionatin Evropian. Çfarë befasie e Dardanit sot. Fabrika e stacionuar në qytetin e Pejës kësaj radhe protagonist një garues mashkull, i ardhur tash e 4 vite nga Prishtina ku kishte filluar xhudon te baba i vet Anton Cena. Punoj me ngulm dhe erdhi i ri kur u nda nga familja por mundi filloj të shpaguhet. Ai e solli në klubin tonë ma besoj djalin e tij dhe sot besoj që Dardani na bëri të gjithëve krenar me 5 luftëra me Ippon të fituara dhe një humbje. Kategoria 73 kg. Të lumtë Dardan”, ka shkruar ai, duke shtuar se Erza Muminoviqi dje ishte e 5 në Evropian.

“Dominoj dhe realisht sipas meje u desh të bëhet Kampione Evropiane por fati ishte kundër saj, me nivelin e treguar e që ishte premtues dhe shpejt do jetë garuese edhe për seniore me rezultate elitare. Për 20 sekonda e humbi plasmanin për finale dhe kjo i kushtoj që mos të jetë në nivel për luftën për medalje. Kategoria e saj 52 kg. Debora Gjakova debutoj në gara serioze humbi por e ardhmja e saj është e sigurt pa asnjë dilemë. Garoj në 57 kg. Me ekipin ishte trajneri Fatos Tabaku, si dhe kryetari i federatës, Agron Kuka. Dhurata më e bukur e ditëlindjes po më vjen nga Praga ku po mbahet Evropiani”, ka shkruar ai.

Dardan Cena kaloi pesë lufta për të fituar medaljen e bronztë./Lajmi.net/