Një ditë pas protestës së tensionuar në Prishtinë, ku pati përplasje mes protestuesve dhe Policisë, Prokuroria Themelore në Prishtinë ka autorizuar Inspektoratin Policor të Kosovës (IPK) për ndërmarrjen e veprimeve paraprake lidhur me veprimet policore gjatë protestës.

Sipas Prokurorisë, veprimet e IPK-së kanë për qëllim mbledhjen e informatave dhe provave lidhur me tejkalimin eventual të autorizimeve policore gjatë përdorimit të forcës për shpërndarjen e protestuesve.

“Prokuroria Themelore në Prishtinë ka autorizuar hetuesit e Inspektoratit Policor të Kosovës (IPK) për ndërmarrjen e veprimeve paraprake lidhur me veprimet e Policisë së Kosovës gjatë protestës së datës 05.10.2026, në hapësirat përreth ndërtesave të Qeverisë dhe Kuvendit të Republikës së Kosovës”, thuhet në komunikatën e Prokurorisë.

Prokuroria ka bërë të ditur se hetuesit e IPK-së do të mbledhin informacione dhe prova për të vlerësuar nëse gjatë përdorimit të forcës ka pasur tejkalim të autorizimeve policore.

“Qëllimi i këtyre veprimeve është mbledhja e informatave dhe provave lidhur me tejkalimin e mundshëm të autorizimeve policore gjatë përdorimit të forcës për shpërndarjen e protestuesve”, thuhet më tej.

Prokuroria dhe IPK-ja do të bashkërendojnë veprimet për të sqaruar secilin rast ku dyshohet se forca mund të jetë përdorur përtej asaj që ishte e nevojshme dhe e autorizuar.

Ky veprim i Prokurorisë vjen një ditë pas protestës së 5 tetorit, e cila u shoqërua me përplasje mes protestuesve dhe Policisë, përdorim të gazit lotsjellës dhe topit me ujë, si dhe arrestime e persona të lënduar. /Lajmi.net/