Nga sot, 22 tetor 2026, ka nisur vaksinimi kundër gripit sezonal në qendrat e mjekësisë familjare në Prishtinë.

Sipas njoftimit të Njësisë së Vaksinimit në QKMF-Prishtinë, qytetarët mund të vaksinohen në Qendrat e Mjekësisë Familjare (QMF) më të afërta, aty ku funksionojnë njësitë e vaksinimit.

Për të marrë vaksinën, qytetarët duhet të kenë me vete letërnjoftimin. Ndërkaq, për fëmijët e vegjël kërkohet certifikata e lindjes me numrin personal, në mënyrë që të bëhet regjistrimi i të dhënave në sistem.

Vaksinimi në Qendrën Kryesore të Mjekësisë Familjare (QKMF) do të zhvillohet nga ora 07:00 deri në 20:00, ndërsa në Qendrat e Mjekësisë Familjare (QMF) nga ora 07:00 deri në 13:30.

Njësia e Vaksinimit në QKMF-Prishtinë u ka bërë thirrje qytetarëve që ta shfrytëzojnë këtë shërbim për t’u mbrojtur nga gripi sezonal. /Lajmi.net/