“Jam i bindur se kjo Qeveri do të bjerë. Të bindur sepse arritëm një marrëveshje më herët në opozitë, na duhej një votë për këtë tani me daljen e URA dhe Civis. Mendoj se rënia e Qeverisë do të jetë fillimi i rimëkëmbjes së situatës në Mal të Zi”, deklaroi Nikoliq i ftuar në TVCG.

Ai tha se iniciativa për largim është dorëzuar nga URA dhe Civis dhe se ajo për përbërjen e Qeverisë është e tyre.

“Kujtojmë që menjëherë pas zgjedhjeve kemi ofruar mbështetje të pakicës vetëm që të mos ndryshojë kursi europian i shtetit. Mendoj se do të ishte mirë nëse do të ndodhte atëherë, nuk do të humbnim një vit e gjysmë”.

“Nuk na intereson a do të jemi në Qeveri apo jo, për ne është e rëndësishme që Mali i Zi të kthehet në rrugën e duhur. Sa i përket fjalëve të vështira në koalicionin qeverisës, ato janë vetëm një konfirmim i marrëdhënieve të këqija në pushtet dhe se është koha të nisemi në një rrugë më të mirë”.

I pyetur se kur pret mbështetje për shkarkimin, Nikoliq tha se URA ka dhënë shpjegim se pse duhet të bjerë qeveria.

“Ne e pranojmë këtë shpjegim, por do ta plotësojmë me një luftë katastrofike kundër koronavirusit, ku njerëzit filluan të trajtohen si numra. Gjithashtu është rritur çmimi i ushqimeve bazë, kemi rritje të papunësisë. Institucionet janë në bllokadë të plotë dhe e vetmja rrugë është që kjo Qeveri të bjerë. Kushdo që të jetë pjesë e mbështetjes për këtë, rëndësi ka që qeveria të bjerë. Për këtë jam plotësisht i bindur”, tha Nikoliq.

Ndërkaq, duke komentuar iniciativën e kryeministrit për shkarkimin e zëvendëskryeministrit, Nikoliq tha se kjo është konfirmim i mendjelehtësisë.

Ai ka deklaruar se do ta mbështesë rënien e Qeverisë dhe se për qeverinë e pakicës do të vendos kur të vijë koha.