Cristiano Ronaldo ka lavdëruar ndikimin pozitiv të Zinedine Zidane në Real Madrid dhe beson se prezenca e francezit paraqet ndihmesë të madhe për të rinjtë në klub.

Zidane u rikthye në Santiago Bernabeu gjatë verës si një prej asistentëve të trajnerit Carlo Ancelotti, dhe Ronaldo është i lumtur që punon me ish mesfushorin francez.

“Zizou jep përvojën e tij si futbollist, dhe kjo është shumë e rëndësishme për futbollistët e rinj, në fakt është fantastike”, deklaroi Ronaldo për Talk Sport.

“Jam shumë i lumtur që punoj me të sepse ishte futbollist fantastik dhe ka përvojë të madhe, andaj edhe për mua është diçka perfekte. Më pëlqen të jem i rrethuar nga më të mirët”, u shpreh ylli portugez.

Ronaldo po ashtu diskutoi edhe marrëdhëniet e tij me Ancelottin dhe theksoi se ka mësuar shumë nga ardhja e italianit në Madrid.

“Ai është njeri fantastik. Ishte futbollist andaj di të merret me futbollistët. Më pëlqen të punoj me të sepse kam mësuar shumë gjëra prej tij dhe stafit, jam shumë i lumtur”, përfundoi Ronaldo.