Një aksident trafiku ka ndodhur sot në fshatin Qyshk të Pejës, ku një këmbësore rreth 27 vjeçare është goditur nga një automjet.

Lidhur me rastin është ndaluar personi u dyshuar, konfirmoi Shkodran Nikçi, zëdhënës në Prokurorinë Themelore të Pejës.

“Prokurori i shtetit bashkë me Inspektoratin Policor ka dalë në vend të ngjarjes. Lidhur me këtë rast janë duke u ndërmarrë të gjitha veprimet e nevojshme hetimore. Personi i dyshuar me urdhër të Prokurorit të shtetit është ndaluar për 48 orë për veprën penale Rrezikimi i Trafikut Publik”, tha Nikçi.

Lajmin për këtë aksident e ka konfirmuar edhe zëdhënësi i Policisë në Pejë, Fadil Gashi.

“Aksidenti ka ndodhur rreth orës 15:45, në magjistralen Pejë – Prishtinë, afër fshatit Qyshk, ku një automjet ka goditur këmbësoren. Policia ka arritur menjëherë në vendngjarje dhe e lënduara po merr trajtim mjekësor në spital. Gjendja e saj është e rëndë,” ka thënë Gashi.

Në lidhje me gjendjen e të lënduarës, Gashi ka thënë para pak minutave për lajmi.net se ajo po trajtohet në QKUK. /Lajmi.net/