Llapi, Ballkani dhe Feronikeli kanë prerë biletat për në fazën tjetër të Kupës së Kosovës.

Llapi ka mposhtur Lirinë me rezultat 3-2 për të kaluar në çerekfinale, shkruan lajmi.net.

Liria kaloi e para në epërsi me golin e Liridon Fetahajt i cili realizoi nga penalltia në minutën e 18’.

Por epërsia e tyre zgjati pak, pasi kapiteni i llapjanëve, Kushtrim Shabani shënoi në minutën e 21’ për të çuar shifrat në 1-1.

Epërsinë e parë Llapit në këtë sfidë ia dha Francisco Rivera me një gol spektakolar nga gjysma e fushës pak minuta para fundit të pjesës së parë.

Llapi e nisi mirë edhe në 45 minutat e dytë, pasi shënuan edhe golin e tretë.

Drilon Fazliu realizoi në minutën e 47’ për rezultatin 1-3.

Krejt në fund vendasit arritën të ngushtojnë epërsinë në 3:2, por që Llapi nuk lejoi befasi dhe kaloi tutje në çerekfinale.

Fitore ka marrë edhe kampioni i Kosovës, Ballkani që ka mposhtur skuadrën nga liga e parë A&N me rezultat të pastër 2-0.

Feronikeli ka arritur të eliminoj Trepçën ’89 duke e mposhtur me rezultat minimal 1-0 falë golit të Susurit nga pjesa e parë.

Ndeshja mes Flamurtarit dhe Vushtrrisë ka përfunduar me rezultat baras 1-1 dhe skuadra që do të kaloj në çerekfinale do të mësohet pas kohës shtesë apo edhe penalltive./Lajmi.net/