Të Infektuar: 41.299

Të Shëruar: 26.453

Të Vdekur: 1.062

Kërkohet ratifikimi i marrëveshjeve ndërkombëtare, D+ i quan papërgjegjësi veprimet e deputetëve

16:31 | 23 Qershor 2020

Organizata Demokraci Plus ka kërkuar ratifikimi i marrëveshjeve ndërkombëtare nga ana e Kuvendit të Kosovës bëhet me votat e shumicës së kualifikuar, apo të paktën dy të tretave të numrit të përgjithshëm të deputetëve.

Sipas D+, ky prag i votimit është më i lartë se sa për zgjedhjen e qeverisë që kërkon votat e shumicës absolute të deputetëve. Ky është një tregues se votimi i marrëveshjeve ndërkombëtare kërkon një konsensus më të gjerë politik, që shkon përtej shumicës parlamentare që mund të përbëjë koalicionin qeverisës, transmeton lajmi.net.

“Një numër i marrëveshjeve ndërkombëtare për gati një vit presin ratifikimin nga ana e Kuvendit. Shumica prej këtyre marrëveshjeve janë negociuar nga dy qeveritë paraprake, që ndër të tjera kanë të bëjnë me zbatimin e projekteve infrastrukturore që prekin direkt përmirësimin e shërbimeve bazike për nevojat e qytetarëve, siç është Marrëveshje për trajtimin e ujërave të zeza në Komunën e Gjilanit, por edhe marrëveshje të tjera të cilat do të lehtësojnë përballje me pasojat ekonomike të shkaktuara nga pandemia COVID-19. Rimëkëmbja ekonomike e vendit nuk është vetëm obligim i Qeverisë, as vetëm i një subjekti politik, është përgjegjësi e të gjitha partive politike të përfaqësuara në Kuvend që kanë marrë besimin e qytetarëve për t’i përfaqësuar. Bllokimi i votimit të këtyre marrëveshje për inate politike të së kaluarës është papërgjegjësi e madhe që shkon në dëm të qytetarëve dhe bizneseve të vendit”, thuhet në reagimin e kësaj organizate.

Demokraci Plus kërkon nga të gjithë deputetët e Kuvendit të Kosovës që të paktën për një moment, të lënë anash dallimet politike dhe ambiciet për pushtet, dhe të përqendrohen në luftën ndaj pandemisë dhe rimëkëmbjen ekonomike të vendit. Në këtë drejtim, bëjmë thirrje që marrëveshjet ndërkombëtare të cilat kërkojnë ratifikimin nga ana e Kuvendit, të trajtohen me seriozitetin më të lartë individualisht, dhe të mos refuzohen pa pasur vërejtje për përmbajtjen e tyre. /Lajmi.net/