Paulo Dybala ishte ylli i Romës këtë sezon dhe ai dëshiron një rritje të pagës në kontratën e tij të re me klubin.

29-vjeçari argjentinas nënshkroi për “Giallorossët” verën e kaluar si një lojtar i lirë, duke nënshkruar një kontratë trevjeçare. Ai është aktualisht lojtari më i paguar në skuadër, por me golat dhe asistimet e tij, argjentinasi është i bindur se meriton rritje të pagës.

Një faktor kyç në kontratën e Dybala është klauzola e tij e lirimit prej 12 milionë euro, e vlefshme për klubet e huaja. Roma dëshiron ta heqë këtë dhe ta mbroj ikonën e re të skuadrës, por kjo me sa duket nuk do të jetë e lehtë edhe pse lojtari ka deklaruar se është i lumtur në kryeqytetin italian, përcjellë lajmi.net.

“Corriere dello Sport” raporton se Dybala aktualisht është në pushime deri më 10 korrik, duke shtyrë çdo bisedë për kontratë, por është bërë e qartë se ai dëshiron një rritje në një marrëveshje të re me Romën, veçanërisht pasi klubet nga Premier Liga tashmë kanë kontaktuar me të dhe kanë shfaqur interesim konkret.

Negociatat do të fillojnë së shpejti mes agjentëve të Romës dhe Dybalas, ku klubi do të përpiqet të gjejë një rrugë për të rritur pagën e tij e cila aktualisht është rreth 6 milionë euro./Lajmi.net/