Në një audio-regjistrim të publikuar nga dosjet Epstein, ish -kryeministri izraelit Ehud Barak dëgjohet duke i thënë pedofilit të dënuar Jeffrey Epstein se ai i kishte kërkuar Presidentit Vladimir Putin që “një milion” rusë të emigronin, me qëllim riformësimin e demografisë së Izraelit dhe dobësimin e pranisë palestineze.

“I thoja gjithmonë Putinit se na duhet vetëm edhe një milion për ta ndryshuar Izraelin në një mënyrë dramatike, një milion rus”, dëgjohet të thotë Barak në regjistrimet e publikuara të premten e kaluar.

Në audio, Barak tha se shumë do të aplikonin dhe do të përshtateshin nën “presionin social”, duke shtuar se autoritetet mund të ishin më “selektive” sesa në valët e mëparshme të emigrimit.

Barak, familja e të cilit është nga Polonia dhe Lituania dhe më vonë u zhvendos si kolonë në Palestinë, thotë në regjistrimin e bërë më 14 shkurt 2015 se Izraeli tani duhet të “kontrollojë cilësinë” e kolonëve të ardhshëm rusë.

Afërsisht një milion emigrantë nga ish-Bashkimi Sovjetik u zhvendosën në Izrael në vitet 1990, por deri në vitin 2005 më pak se gjysma ishin hebrenj ose konsideroheshin hebrenj sipas ligjit ortodoks.