Deputetja e LDK-së, Rrezarta Krasniqi, ka kritikuar pushtetin lidhur me gjendjen e rrugës Prishtinë-Mitrovicë.

Krasniqi është shprehur se ka ngritur zërin disa herë në Kuvend ku ka hapur diskutim për çështjen e kësaj rruge, shkruan Lajmi.net.

Teksa shton se  për të njëjtën gjë kryeministri Albin Kurti dhe ministri Liburn Aliu kanë gënjyer publikisht duke thënë se do të përfundohet brenda 12 muajve.

Deputetja e LDK thotë se ajo që po ndodh me këtë rrugë është një e padrejtë që po iu bëhet qytetarëve të Mitrovicës.

Krasniqi ka thënë se Qeveria Kurti pas 4 vitesh pushtet do të mbahet mend si qeveri e mashtrimeve pa asnjë punë të mirë.

Reagimi i plotë:

Mashtrimet e Qeverisë për rrugën Prishtinë-Mitrovicë nuk kanë të ndalur

Disa herë e kam ngritur çështjen e rrugës Prishtinë-Mitrovicë në Kuvend dhe në reagime publike. Ministri Liburn Aliu dhe Kryeministri Kurti patën gënjyer publikisht duke thënë se kjo rrugë do të përfundoj brenda 12 muajve.

Kontrata me kosto 25 milionë euro për ndërtimin e kësaj rruge paska afat kohor prej 25 muajve për përfundimin e punimeve. Mashtrimet për vite me radhë dhe torturimet që po ju bëhen qytetarëve të Vushtrrisë e Mitrovicës është e padrejtë dhe do të ndëshkohet nga qytetarët për këto premtime të parealizuara e mashtrime koti.

Për 4 vite pushtet qeveria Kurti nuk do ta përfundoj rrugën për Mitrovicë dhe asnjë investim tjetër kapital. Do të mbaheni në mend si qeveri e mashtrimeve dhe Qeveri pa asnjë punë të hajrit.