Ish anëtari i Tottenham Hotspur, Berbatov, ka dhënë disa komente për anëtarin e Real Madrid, Bale.

Bale po lidhet me një largim të mundshëm nga Reali, në drejtim të Newcastle, por kjo sipas Berbatov do të ishte lëvizje e gabuar, pasi skuadrat nuk janë të nivelit të njëjtë.

“Në secilin rast kur Gareth Bale përmendet, ka të bëjë me atë nëse ai qëndron apo largohet nga Real Madrid, nëse luan apo shënon, apo luan golf dhe pse luan golf”, ka thënë Berbatov, i pyetur për Bale, transmeton lajmi.net.

“Shumë njerëz besojnë se ai duhet të largohet dhe disa tifozë e duan atë të largohet, por unë mendoj se atij i pëlqen atje, dhe nëse ashtu është, atëherë ajo është çfarë ka rëndësi për të”, ka shtuar bullgari.

“Newcastle mund ta dëshirojë atë, dhe duhet ta bindin me projektin e tyre. Por, me gjithë respektin, nuk mund të krahasohen Real Madrid dhe Newcastle”, ka thënë mes shumë tjerash Berbatov.

Njësoj si Berbatov, edhe Bale ka qenë anëtar i Tottenham Hotspur. Nuk dihet nëse uellsiani do të kthehet për një aventurë të dytë në Premierligë. /Lajmi.net/