Carlo Ancelotti i ka përgëzuar lojtarët e Real Madridit për paraqitjen e tyre në fitoren 4:0 ndaj Real Sociedadit, ndërsa ka paralajmëruar se ‘Los Blancos’ do të luftojnë për titull të kampionit deri në xhiron e fundit.

Merengues fituan bindshëm ndaj ekipit bask dhe mbetën tri pikë prapa liderit Atletico Madrid, falë golave të Asier Illarramendi, Gareth Bale, Pepe e Alvaro Morata.

Trajneri italian thotë se është i kënaqur me mënyrën se si po luan ekipi për momentin dhe e përshëndeti shpirtin e tyre luftarak.

“Fitorja na ngrit neve si ekip. Do të luftojmë deri në lojën e fundit. E shijova tërë lojën, sepse luajtëm mirë, mjaft inteligjentë. Jam mjaft i lumtur”, deklaroi Ancelotti pas ndeshjes.

“Nuk ishte e lehtë, por ne e kemi ekipin që pëlqen të luftojë. Jam krenar që e udhëheq këtë ekip. Gareth Bale ndihet rehat në të majtë dhe, ai dhe Ronaldo shprsh i ndërrojnë pozitat. Vendosa ta pushoj Cristianon, për t’u shëruar”.

“Ajo që më kënaqi po ashtu ishte aspekti fizik i ekipit. Ne u mbrojtëm mjaft mirë dhe ishim mjaft të organizuar”, përfundoi ish trajneri i Juventusit, Milanit, Chelseat e PSG-së.