Zgjedhjet lokale për Komunën e Prizrenit do të mbahen më 12 tetor 2025, dhe gara për postin e kryetarit pritet të jetë ndër më të ashpërat dhe më të vëmendshmet në nivel vendi.

Deri tani, katër parti politike kryesore kanë zyrtarizuar kandidatët e tyre për të drejtuar qytetin e dytë më të madh në Kosovë, transmeton lajmi.net

Shaqir Totaj (PDK) – Kryetari aktual i Komunës së Prizrenit do të garojë për një mandat të dytë. Totaj vjen nga radhët e Partisë Demokratike të Kosovës dhe ka fituar zgjedhjet e fundit lokale duke e rikthyer këtë komunë nën drejtimin e PDK-së pas disa vitesh. Gjatë mandatit të tij, Totaj ka premtuar investime në infrastrukturë, përmirësim të shërbimeve publike dhe zhvillim të turizmit kulturor e historik që është tipar dallues i Prizrenit. Ai do të synojë të kapitalizojë mbi përvojën dhe punën e bërë gjatë këtyre katër viteve.

Artan Abrashi (VV) – Deputet aktual i Kuvendit të Kosovës dhe njëri nga figurat më të njohura të Lëvizjes Vetëvendosje në Prizren. Abrashi u zyrtarizua sot nga kryetari i VV-së, Albin Kurti, në një tubim në qendër të qytetit. Ai shihet si një kandidat me përkrahje të fuqishme nga partia në pushtet në nivel qendror. Vetë Kurti e quajti Abrashin një figurë të ndershme dhe vizionare, që do ta çojë përpara Prizrenin në shumë fusha.

Driton Selmanaj (LDK) – Ish-zëvendëskryeministër dhe deputet, Selmanaj do të jetë kandidati i Lidhjes Demokratike të Kosovës. Ai është një figurë me përvojë në skenën politike, si në nivel lokal ashtu edhe në atë qendror. Me një profil institucional dhe të moderuar, LDK shpreson të rikthejë ndikimin në këtë komunë historikisht të rëndësishme për partinë. Selmanaj pritet të ketë përkrahje të madhe nga strukturat tradicionale të LDK-së në Prizren.

Besnik Krasniqi (AAK) – Aleanca për Ardhmërinë e Kosovës do të garojë me Besnik Krasniqin për të sfiduar partitë më të mëdha në këtë garë. Krasniqi ka qenë i angazhuar në nivel lokal për vite me radhë dhe partia e sheh atë si kandidatin më të përshtatshëm për të sjellë një alternativë të re për qytetarët e Prizrenit. AAK ka paralajmëruar një fushatë intensive, me fokus në zhvillimin ekonomik dhe përkrahjen për bizneset lokale.

Zgjedhjet e 12 tetorit pritet të jenë një test serioz politik për të gjitha partitë. Prizreni, si një nga komunat më simbolike dhe më të rëndësishme për nga pesha politike dhe historike, do të jetë në fokusin e të gjithë opinionit publik.

Në këtë garë pritet një rivalitet i fortë ndërmjet Shaqir Totajt dhe Artan Abrashit, por ndikimi i LDK-së dhe AAK-së gjithashtu mund të luajë rol vendimtar në balotazh, nëse asnjëri nga kandidatët nuk arrin shumicën në raundin e parë.

Me datën gjithnjë e më afër, partitë kanë nisur mobilizimin dhe përgatitjet për një fushatë të fuqishme, që do të zhvillohet jo vetëm në qytet, por edhe në fshatrat dhe lagjet e largëta të komunës./lajmi.net/