Rasti i parë i infeksionit te njeriu me virusin Shamonda është konfirmuar në Francë.

Pacienti, tek i cili u zbulua virusi, ka ndërruar jetë, njoftuan autoritetet shëndetësore franceze.

Pacienti ndërroi jetë në fillim të tetorit në Lion, ku po trajtohej për një sëmundje të rëndë në spitalin “Hospices Civils de Lyon”.

Sipas Ministrisë Franceze të Bujqësisë, pacienti kishte një sistem imunitar të komprometuar.

Megjithatë, ende nuk është përcaktuar nëse virusi e shkaktoi vdekjen apo kontribuoi në të.

Virusi Shamonda bën pjesë në grupin orthobunyaviruses, konkretisht në serogrupim “Simbu”, i cili përfshin gjithashtu virusin Schmallenberg. Ai prek kryesisht kafshët e fermave, veçanërisht gjedhët, dhe transmetohet përmes pickimit të insekteve të vogla fluturuese të ngjashme me mizat të gjinisë Culicoides.

Këtë verë, virusi u zbulua për herë të parë në Evropën Perëndimore. Janë regjistruar raste në Austri, Belgjikë, Francë, Gjermani, Irlandë, Itali, Lihtenshtajn, Luksemburg, Holandë, Portugali, Spanjë dhe Zvicër, si dhe në ishullin Xhersi.

Besohet se infeksioni ka ndodhur përmes pickimit nga një mushkonjë e vogël e infektuar. Megjithatë, Qendra Evropiane për Parandalimin dhe Kontrollin e Sëmundjeve (ECDC) deklaron se lloji specifik i insekteve që ka shërbyer për transmetimin nuk është identifikuar ende.

Autoritetet franceze theksojnë se, bazuar në njohuritë aktuale, nuk është identifikuar ndonjë rrezik shëndetësor për popullatën.