Më 7 gusht, ministri në detyrë i Bujqësisë dhe kandidati për kryetar të Mitrovicës nga radhët e VV-Guxo-Alternativa, Faton Peci, publikoi një fotografi nga një ndejë në fshatin Boletin të Mitrovicës, ku shfaqej i rrethuar nga pjesëmarrës me plisa të bardhë, ushqim dhe pije në tavolinë.

Postimin e tij ai e shoqëroi me përshkrimin: “Garda e parë e shtetit shqiptar, Boletini me plisa të bardhë! Boletin, Mitrovicë!”, transmeton lajmi.net.

Pas publikimit, kanë lindur pyetje nëse kjo ngjarje kishte karakter zyrtar apo politik dhe kush qëndronte pas organizimit të saj.

Ministria e Bujqësisë ka mohuar përfshirjen në këtë aktivitet, duke thënë për Lajmi.net:

“Ju njoftojmë se organizimi i aktivitetit në fshatin Boletin të Komunës së Mitrovicës nuk është iniciuar dhe as organizuar nga Ministria e Bujqësisë, Pylltarisë dhe Zhvillimit Rural.”

Edhe Komuna e Zveçanit, nën juridiksionin e së cilës bie aktualisht fshati Boletin, është distancuar nga organizimi. Kryetari Ilir Peci ka deklaruar për Lajmi.net:

“Për këtë organizim komuna nuk ka qenë në dijeni dhe nuk e dimë qëllimin e këtij organizimi të organizuar nga Faton Peci, tash kandidat për kryetar i Komunës së Mitrovicës, ka qenë për arsye politike pasi është ministër i Bujqësisë dhe asnjëherë nuk ka qenë në vizitë edhe pse është nga fshati Zhazhë, pra është për qëllime politike.”

Kabineti i Faton Pecit nuk i është përgjigjur kërkesës së Lajmi.net për sqarime shtesë rreth këtij aktiviteti.

Në mungesë të një deklarate zyrtare nga vetë organizatorët, mbetet e paqartë nëse ngjarja është mbështetur financiarisht nga fondet publike apo është një iniciativë private me qëllim politik.

Kjo ngre dyshime në opinion lidhur me transparencën e shpenzimeve dhe natyrën e organizimit, sidomos duke pasur parasysh përfshirjen e një zyrtari publik në procesin elektoral./lajmi.net/