Marko Millosheviq, nipi i kasapit të Ballkanit Sllobodan Millosheviq dhe anëtar i koalicionit qeverisës në parlamentin serb, mori pjesë në tubimet spontane të njerëzve pro regjimit të Aleksandar Vuçiq.

Protestat e mbrëmshme në qytetet e Serbisë u mbajtën pasi më herët njerëzit e Vuçiq kishin rrahur studentët dhe qytetarët protestues, pas shembjes së një tende hekurudhore në Novi Sad më 1 nëntor 2024, në të cilën gjetën vdekjen gjashtëmbëdhjetë persona.

Marko Millosheviq, anëtar i Bordit Kryesor të Partisë Socialiste të Serbisë ishte në tubimin e njerëzve të Vuçiq në Pozharevc.

Zllatko Miladinoviq, president i Komitetit të Qytetit të DS në Pozharevc, tha për Danas, se Marko shpesh shihet në tubimet e organizuara nga partia e Sllobës së vogël, Ivica Daçiq. Ndërsa për Slavica Radovanoviq, anëtare e grupit të Lëvizjes së Punëtorëve Sloga – Struka, gjërat janë të qarta.

“Pushteti dhe autoriteti janë të vetmet premisa që përfaqëson Partia Socialiste e Serbisë, kështu që nuk është për t’u habitur që një Millosheviq është i pranishëm në Pozharevc, ku jeton, në mbështetje të regjimit në pushtet, kushdo qoftë ai,” tha ajo për Danas.

Branislav Guta-Grubaçki, një përfaqësues i Frontit të Gjelbër-të Majtë të Vojvodinës, beson se pjesëmarrja e nipit të kasapit të Ballkanit në tubimin e thirrur nga partia e Vuçiq nuk është aspak e rastësishme.

“Dje, mbështetësit e regjimit ‘punuan’ për të shënuar datëlindjen e Sllobodan Millosheviq, krijuesit të kësaj çmendurie të përhershme në të cilën kemi jetuar për gati katër dekada. Në këtë, shpresoj, ‘debat trashëgimie të seancës së tetë të Asamblesë Kombëtare Serbe’, Marko, si nip i gjyshit, ka edhe rolin e tij simbolik. Si përfaqësues i Partisë Socialiste të Serbisë në Asamblenë Kombëtare nga Pozharevci, ai duhet të përfaqësojë një metaforë në rrugë për vazhdimësinë e sundimit të Serbisë nga e njëjta bandë banditësh,” tha Grubaçki për Danas.

“Jam optimist se së shpejti do të marrin fund, por nuk do të ketë relaksim apo lehtësim të tensioneve derisa t’u shohim shpinën. Shihemi në rrugë,” përfundon Grubaçki.

Babai i Marko Millosheviq (26), Marko Milloshevi i vjetri, i biri i kasapit të Ballkanit, pas protestave të 5 tetorit 2000, jeton në Rusi. Në qershor 2024, ai u shfaq në publik për herë të parë në më shumë se 20 vjet në Moskë.

Emri i tij u gjet në një urdhër arresti të Interpolit, së bashku me emrin e nënës së tij Mirjana Markoviq. Të dyve iu dha azil në Rusi, dhe Mirjana ndërroi jetë në vitin 2019. Në vitin 2007, u lëshua urdhër arresti për Marko Millosheviq i vjetri, për përfshirje në kontrabandën e duhanit 1996-2001.