Këshilli Prokurorial i Kosovës (KPK) në takimin e 265-të, të enjten, ka miratuar kërkesën Kryeprokurorit të Prokurorisë Themelore në Prizren, Petrit Kryeziu që të fillohet hetimi disiplinor ndaj një prokurori në këtë Prokurori, me propozimin që t’i shqiptohet vërejtje publike me shkrim. Me këtë rast u themelua Paneli Hetimor.

“Me dhjetë vota për dhe një abstenim miratohet kërkesa e kryeprokurorit në Prizren”, tha kryesuesi i KPK-së, Ardian Hajdaraj.

Në votim abstenoi anëtarja e Këshillit, njëherit prokurore në Prizren, Arjana  Shajkovci.

Paneli Hetimor u themeluar me short, me këtë përbërje: Arbresha Shala-Raçi-kryesuese, Blerim Igrishta dhe Rafet Halili- anëtarë, ndërkaq Bahri Hyseni dhe Agim Kuka- anëtarë rezervë të Panelit.

KPK-ja në këtë takim miratoi raporton vjetor për zbatimin e Planit të veprimit të Planit Strategjik për vitin 2022-2024.

Për këtë plan, ushtruese i detyrës së Kryeprokurorit të Shtetit, Besim Kelmendi tha se edhe pse ka hyrë në fuqi ligji për ndërmjetësim dhe janë paraparë pozitat për referentë të ndërmjetësimit, nuk po ndahen mjete buxhetore për këto pozita.

Andaj, Kelmendi tha se i bën thirrje Qeverisë që për ligjet e miratuara dhe në fuqi që vetë kanë paraparë pozita, t’i ndajnë edhe mjetet buxhetore për t’u plotësuar. Ai shtoi se me këto veprime do të ruhej buxhetit i shtetit.

“Mosndarja e buxhetit për zyrtarë të ndërmjetësimit është në dëm të buxhetit të Republikës së Kosovës, andaj i bëj thirrje të ndajë buxhet për pozitat që vetë i kanë parapa me ligj”, deklaroi Kelmendi.

Po ashtu, u miratua edhe Plani Vjetor i Punës së Këshillit për vitin 2025. Me këtë rast, zëvendëskryesuesja e Këshillit, Jehona Grantolli thuri lavde për drejtorin e Sekretariatit të Këshillit.

“Prokurorët dhe stafi administrativ janë duke parë ndryshimet që janë duke ndodhur në vendet e punës, e vleresojmë shumë nga ana e juaj këtë pikë që për neve, e lehtëson punën e sistemit prokurorial e që edhe pika tjera të përmbledhura në këtë raport janë siç duhet”, tha Grantolli.

Më pas, prokurori Shukri Jashari u emërua anëtar në Këshillin Drejtues të Akademisë së Drejtësisë, pas përfundimit të mandatit nga prokurorja Dulina Hamiti.

Gjithashtu, në këtë takim Kelmendi njoftoi se për procesin e avancimit në Departamentin për të Mitur në Prokurorinë Themelore në Gjakovë nuk ka aplikuar asnjë kandidat.

Ndërkaq, Kelmendi tha se për procesin e avancimit në Departamentin për Krime të Rënda në Prokurorinë Themelore në Gjakovë ka aplikuar një prokuror Arban Hasanaj, e i cili edhe u avancua me të gjitha votat e anëtarëve të Këshillit. Ai tha po ashtu se Hasanaj ka shprehur gatishmëri që të punojë edhe lëndë për të mitur si shkak i ngarkesës.

Më pas, mbledhja vazhdoi me dyer të mbyllura për Raportin përmbledhës të vlerësimit vjetor nga kryeprokurorët për prokurorë të shtetit për vitin 2024./BetimipërDrejtësi