Komisioni Qendror Zgjedhor sot do të mbajë mbledhjen e radhës, në të cilën do të bëhet edhe certifikimi i rezultateve të zgjedhjeve të 9 shkurtit.

Mbledhja e KQZ-së do të mbahet në ora 16:00.

KQZ ka njoftuar se në rend dite të kësaj mbledhje ka edhe disa pika: zëvendësimin e të zgjedhurve që kanë hequr dorë nga pozita e deputetit dhe certifikimin e rezultateve përfundimtare të zgjedhjeve për Kuvendin e Kosovës, të mbajtura më 9 shkurt 2025.

Nëse certifikimi i rezultateve bëhet sot, i bie që  procesi i certifikimit të zgjedhjeve bëhet pas më shumë se 40 ditëve.

Ky proces i tejzgjatur i certifikimit të rezultateve bëhet pas ankesave të partive politike në lidhej me mbarëvajtjen e procesit zgjedhor.

Disa prej këtyre ankesave shkuan deri tek Gjykata Supreme e cila pati afat deri dje që të përmbyllë vendimet në lidhje me këto ankesa.

Në rezultatin përfundimtar të zgjedhjeve që u miratua ditë më parë, KQZ njoftoi se nga zgjedhjet parlamentare të 9 shkurtit Lëvizja Vetëvendosje mori mbi 390 mijë vota apo 42.30 për qind.

Partia Demokratike e Kosovës mori mbi 190 mijë vota apo 20.95% e pasur nga Lidhja Demokratike e Kosovës me mbi 170 mijë vota apo 18.27 për qind, raporton lajmi.net.

Pas saj u radhit koalicioni AAK-Nisma me mbi 66 mijë vota apo 7.06 për qind.

Lista Serbe apo partia më e madhe e serbëve në Kosovë siguroi mbi 39 mijë vota apo 4.26%.

Duke marrë parasysh këto rezultate i bie që Vetëvendosje të ketë siguruar 48 ulëse në Kuvendin e Kosovës, PDK-ja 24 ulëse, LDK-ja 20 kurse Lista Serbe nëntë vende dhe koalicioni AAK-Nisma tetë ulëse./Lajmi.net/