Kandidati për Kryeministër nga radhët e PDK-së, Bedri Hamza, në kuadër të punëtorive me qytetarë për programin e tij, ka qëndruar në Prizren për të dëgjuar shqetësimet dhe kërkesat e tyre. Hamza ka thënë se ka marrë ide dhe sugjerime të mira, të cilat do të bëhen pjesë e programit të tij qeverisës.

Përmes një njoftimi për medie bëhet e ditur se kandidati i PDK-së për kryeministër, Bedri Hamza,  ka thënë se Kosova ka nevojë për një program qeverisës për qytetarin, më shumë sesa për kabinetin e ministrave.

“Neve na nevojitet një program për qytetarin. Jo një program për një kabinet të ministrave ose për politikën. Mora ide të jashtëzakonshme dhe ju siguroj që një pjesë të madhe keni me i pas në programin e PDK-së, në programin tim”, ka thënë Hamza.

Ai ka thënë se një prej sfidave më të mëdha të ekonomisë është papunësia dhe deficiti i lartë tregtar.

“Disa nga kërkesat që kandidati i PDK-së për kryeministër mori nga qytetarët e Prizrenit kanë të bëjnë me përmirësimin e kushteve në shëndetësi, art e sport, por edhe në fuqizimin e ekonomisë dhe krijimin e vendeve të reja të punës”, thuhet në njoftim.