Rritet numri i rasteve ditore me koronavirus në Kosovë, paralajmërohet përkeqësim i situatës
Sot në Kosovë ka pasur një numër më të madh të rasteve të reja me koronavirus.
Lajme
Gjatë 24 orëve të fundit janë paraqitur 340 raste të reja nga gjithsej 2715 mostra të testuara të marra nga ShSKUK dhe gjurmimi i kontakteve të rasteve në terren, shkruan lajmi.net.
Përveç kësaj, edhe 411 pacientë e kanë fituar betejën me COVID-19 brenda këtij 24 orëshi.
Shqetësuese është fakti se brenda 24 orëve të fundit janë regjistruar 10 raste të vdekjes.
Rastet e vdekjes janë nga komunat: Prishtinë 3 raste (67, 80, 55 vjeç), Prizren 2 raste (54, 46 vjeç), Rahovec 2 raste (76, 52 vjeç), Ferizaj 1 rast (72 vjeç), Gjakovë 1 rast (81 vjeç) dhe Vushtrri 1 rast (58 vjeç).
Numri total i rasteve pozitive në Kosovë që nga fillimi i pandemisë është 65,690 raste nga 280,071 persona të testuar.
Numri i personave të cilët janë shëruar deri më sot është 57,385 raste ndërsa aktualisht raste aktive me COVID-19 janë 6737.
Kryetari i Prishtinës, Shpend Ahmeti ka parashikuar rritje të numrit të infeksioneve të reja me COVID-19 në Kosovë.
Ai nëpërmjet një postimi në Facebook ka theksuar se moskujdesi i partive politike gjatë fushatës zgjedhore së bashku me trendin e rritjes së infeksioneve të reja në Evropë do të sjellë rritje të rasteve edhe në vendin tonë. /Lajmi.net/
