Paqartësi rreth vendimit të qeverisë, Ahmeti kërkon që prindërit të mos i dërgojnë fëmijët në çerdhe
Qeveria në detyrë sot ka marrë vendimin për rihapjen e çerdheve publike dhe ato private.
Lajme
Gjatë ditës së sotme Qeveria në detyrë e Kosovës në mbledhjen e mbajtur ndër të tjerash ka marrë vendim edhe për rihapjen e çerdheve publike dhe private në vend.
Gjatë mbledhjes së qeverisë u tha se çerdhet do të rihapen nga 1 qershori, kurse në konferencën për medie, ministri në detyrë i Shëndetësisë, Arben Vitia, bëri të ditur se do të rihapen më 8 qershor.
Kjo ka bërë konfuz edhe të parin e Prishtinës, Shpend Ahmeti, shkruan lajmi.net.
Për më tepër, Ahmeti ka thënë se asnjë informacion zyrtar nga Ministria e Shëndetësisë nuk e kanë marrë mbi rregullat e këtij vendimi.
Ai iu ka bërë thirrje që të mos i dërgojnë fëmijët në çerdhe deri në momentin që të bëhen publike rregullat dhe vendimet.
Postimi i plotë i Ahmetit, pa ndërhyrje:
Sot në konferencë për media të qeverisë u fol edhe për rihapjen e çerdheve. U përmenden dy data, 1 qershor dhe 8 qershor. Po ashtu u përmenden edhe rregullat strikte për çerdhet. Por nuk kemi marr asnjë informate zyrtare e as informatë mbi rregullat.
Ne presim që Ministria e Arsimit të qartësojë situaten dhe rregullat, po shpresojmë sonte.
Prandaj, prindër të nderuar, mos i dërgoni fëmijët në çerdhet publike dhe ato me bazë në komunitet në komunën tonë deri ti marrim vendimet dhe rregullat nga niveli qendror dhe derisa çerdhet përkatëse ku i keni fëmijët të ju lajmërojnë për funksionimin e plotë.
Çerdhet do të rihapen këto ditë, por ka nevojë për më shumë detaje e përgatitje.
#rihapja. /Lajmi.net/