(E plotësuar) Kryetari i ri i Kuvendit të Kosovës, Kadri Veseli, me të marrë detyrën, para se tu drejtohet deputetëve me një fjalim, fillimisht ka falënderuar ata që kanë votuar kundër tij dhe ata që kanë abstenuar, e më pas edhe ata që kanë votuar pro.

Fjalimin e tij para deputetëve, e ka nisur duke falënderuar fillimisht familjet e dëshmorëve.

“Adem Jashari, është inspirim dhe sinonim sublim, UÇK ishte kapitulli i fundit por më i rëndi e më i rëndësishmi për liri dhe shtet”, ka thënë Veseli.

Ai ka falënderuar edhe Presidentin historik dr. Ibrahim Rugova.

“Ky kuvend do të jetë një kuvend i debateve gjithëpërfshirëse”, ka shtuar ai.

Sipas tij, ky do të jetë një kapitull i ri për Kuvendin dhe Kosovën, duke premtuar angazhim që përshpejtojnë rrugën euroatlantike. 

_________________________________

Zv.kryetari i PDK-së, Kadri Veseli, është zgjedhur kryetar i Kuvendit të Kosovës, me 71 vota për, 42 vota kundër dhe 1 abstenim. 

Kundër kanë votuar deputetët e Lëvizjes Vetëvendosje. Ndërsa, deputeti i kësaj partie Visar Ymeri gjatë paraqitjes së propozimit të kandidatit të tyre për nënkryetar, ka kundërshtuar zgjedhjen e Veselit për kryetar, duke thënë se shefi i nëntokës u zgjodh në krye të institucionit përfaqësues të popullit. 

Ndërsa nënkryetarë të Kuvendit, janë zgjedhur Xhavit Haliti nga PDK, Sabri Hamiti nga LDK dhe Glauk Konjufca nga Vetëvendosje. 

Vazhdimi i seancës konstituive të Kuvendit ka filluar nga pika ku ka ngelur më parë, ajo e zgjedhjes së kryetarit të Kuvendit dhe nënkryetarëve.

Nënkryetari i PDK-së Hajredin Kuqi, ka propozuar Kadri Veselin për kryetar të Kuvendit, ndërsa Xhavit Halitin për nënkryetar nga PDK.