Çdo vit më në të dielën e tretë të muajit nëntor shënohet Dita Botërore e përkujtimit të viktimave në komunikacion rrugor.

Kjo ditë  daton nga viti 1993 nga Road-Peace dhe është miratuar nga Kombet e Bashkuara në vitin 2005, e cila që nga ajo kohë njihet si ditë ndërkombëtare e përkujtimit të viktimave në aksidentet rrugore.

Lidhur me këtë ditë Policia e Kosovës, përmes një komunikate për media, ka bërë të ditur se është e angazhuar në ngritjen e nivelit të sigurisë në përgjithësi, veçanërisht Divizioni i Komunikacionit Rrugor është i përkushtuar në ngritjen e nivelit të sigurisë në komunikacionin rrugor, gjegjësisht në parandalimin e aksidenteve të kësaj natyre.

“Qëllimi i shënimit të kësaj dite është sensibilizimi i qytetarëve, në veçanti i pjesëmarrësve në komunikacionin rrugor, pa marrë parasysh cilësinë e tij, shofer, pasagjer dhe këmbësorë, që së bashku të kontribuojmë për një siguri më të madhe në komunikacionin rrugor”, thuhet në komunikatën e Policisë.

Më tej thuhet se Dita Botërore e përkujtimit të viktimave në komunikacionin rrugor është një përkujtues i fuqishëm dhe prekës për të gjithë në lidhje me rëndësinë e punës që duhet të bëjnë policia  së bashku për të përmirësuar sigurinë rrugore.

“Policia e Kosovës ka qenë dhe vazhdojnë të jenë të përkushtuar për të ofruar siguri për të gjithë pjesëmarrësit në komunikacionin rrugor, por është e nevojshme ndihma e të gjithëve, që numri i viktimave të cilët përkujtohen në këtë ditë, të jetë sa më i vogël”, thuhet në komunikatën për media të Policisë së Kosovës.

Policia gjithashtu apelon tek të gjithë pjesëmarrësit në trafik që të respektojnë dispozitat e lëmit të komunikacionit rrugor .