Së paku këto janë të dhënat që i ka prezantuar BIK-u, përfaqësuesit e së cilës thonë se ato duhet të mbyllen pasi që nuk kanë asnjë informatë se çfarë aktiviteti zhvillohet në to, kush i drejton dhe për çfarë arsye funksionojnë, shkruan sot Koha Ditore.

Resul Rexhepi, sekretari i BIK-ut, ka shpjeguar se posedojnë informata që në Kosovë janë katërt vend-falje të ashtuquajtura xhami, dy prej të cilave janë funksionale dhe ndodhen në Dragash.

Ndërkaq dy të tjera që janë mbyllur dhe ka thënë se ndodheshin në Deçan dhe tjetra në Prishtinë, e cila u mbyll ditë më parë në kuadër të një operacioni që rezultoi me arrestimin e 40 personave të dyshuar për kryerjen e disa veprave penale që lidhen me terrorizëm.

Por Rexhepi nuk e përjashton mundësinë që mund të ketë edhe objekte të tjera që ushtrojnë aktivitete të pakontrolluara nga BIK-u. 

BIK-u është akuzuar nga disa hoxhallarë për mosreagim, por pas arrestimit të 40 personave të dyshuar për terrorizëm, ky institucion ka mbështetur aktivitetet e policisë në parandalimin e radikalizmit fetar.