Komuna e Prishtinës, nën qeverisjen e Isa Mustafës, më 22 gusht të vitit 2013, kishte njoftuar se për arsye të përmirësimit të infrastrukturës dhe kujdesit të ambientit, kontejnerët mbitokësorë do të zëvendësoheshin me ata nëntokësorë.

Ky projekt, parashihte që kontejnerët nëntokësorë të ndërtohshin në disa rrugë kryesore të qendrës së Prishtinës.

Por, edhe me ndërrimin e qeverisjes, pas më shumë se gjysmë viti, ky projekt vazhdon të zvarritet.

Ardian Gashi, Drejtori i Drejtoratit për Shërbime Publike në Komunën e Prishtinës thotë se operatori i kontraktuar për këtë projekt ka afat deri në fund të korrikut që të kryejë punimet.

Gashi në një prononcim për lajmi.net tha se ky projekt është në përfundim e sipër.

“Operatorin për ndërtimin e kontejnerëve nëntokësor, ka afat deri në fund të korrikut për këtë edhe pse kemi kërkuar nga operatori që puna të kryhet më herët dhe më shpejt sepse e kemi parë që nuk ka me pas punë shumë por kemi marrë premtim nga operatori që deri në gjysmë të qershorit do të përfundojë dhe këtë premtim nuk e ka mbajt operatori”.

Gashi paralajmëron se mosrealizimi punimeve në bazë të kontratës, do të penalizohet nga organet komunale.

“Kontrata parasheh se nëse puna nuk kryhet në bazë të kritereve dhe kohës të kontraktuar, pala apo operatori që është i kontraktuar e ka lënë një garancion bankar sa i përket kësaj kontrate, dhe nëse nuk i përmbahet kontratës, mendoj se atëherë do të zbatohet penalizimi”, tha Gashi për lajmi.net.