Ndërkohë, agjencia Reuters raporton se në Izrael janë vrarë katër izraelitë, dhe shumë të tjerë janë plagosur pas një sulmi me mortaja në qytetin Eshkol, pranë kufirit me Gazën.

Të paktën 10 persona, mes tyre tetë fëmijë, u vranë të hënën pasdite nga shpërthimet në Gaza, thanë zyrtarë palestinezë.

Ata thanë se viktimat u vranë nga sulmet me raketa të Izraelit, por këta të fundit thanë se shpërthimet u shkaktuan nga raketa që u lansua gabimisht nga militantët e Hamasit.

Numri i viktimave deri tash ka shkuar në mbi 1,040 palestinezë dhe 46 izraelitë.

Sulmit ndaj parkut i parapriu goditja e spitalit në afërsi, kur u plagosën disa persona, raportojnë burimet palestineze, por reporterëve iu ndalua incizimi aty.

Mediet izraelite kanë raportuar se sonte në territorin e këtij shteti përmes një tuneli është futur një grup militantësh të Hamasit, të cilët pastaj kanë hapur zjarr ndaj ushtarëve, njofton Ushtria e Izraelit.

Në komunikatë thuhet se ka filluar kërkimi iI ushtarëve, pa hyrë në detaje, transmeton agjencia AP. Sipas medieve izraelite, me këtë rast janë vrarë pesë ekstremistë, por që ka edhe të plagosur nga pala izraelite.  

Sipas Izraelit, deri tash janë shkatërruar rreth 20 tunele të tilla, kurse kërkimet për to vazhdojnë akoma.