Nishani thotë se ka informacione, që i kanë mbërritur në rrugë zyrtare, se në të gjithë Shqipërinë, një e deri në 24 orë para zgjedhjeve, janë ofruar lekë për të blerë votat

“Informacionet e mia zyrtare, serioze, tregojnë që është përdorur resurs i madh financiar për të blerë votat. Në të gjithë territorin shqiptar”, shprehet Presidenti në një intervistë për RTSH.

Kjo sipas tij, ka ndikuar edhe në rezultatin final të zgjedhjeve, ku PS u shpall fituese me 74 mandate.

“Për sa kohë është kaq e përhapur si dukuri, ndikon në mandatet në mënyrë të drejtpërdrejtë. Për sa kohë ndikon në mandate, mandatet përbëjnë rezultatin e përgjithshëm të zgjedhjeve. Dhe, nëse ka një dukuri që ka ndikuar shumë është shitblerja e votës. Të shpenzosh para kaq shumë për të blerë vota, do të thotë që këto para nuk janë para të ndershme”, shprehet Nishani, duke shtuar se Presidenca nuk mund të ndërhyjë në këto parregullsi sepse këtë nuk e lejon korniza kushtetuese dhe ligjore. /RTSH/