Mustafa tha se kjo Konventë po mbahet në kohë kur Kosova po korr suksese historike në zhvillimin ekonomik dhe social.

“Ky muaj ka qenë muaj historik dhe ne i gëzohemi këtyre të arriturave. Jam krenar që kisha përkrahjen më të madhe të LDK-së dhe qytetarëve që të drejtoj Qeverinë e koalicionit kur Kosova po gëzon kthesa të mëdha në rrugën e bashkimit evropian. Rezultatet nuk vërehen vetëm, dhe nëse ecet së bashku arrihet shumë më lartë, e kësaj radhe ne kemi bashkëpunuar me gjithë partnerët. Kosova ka edhe sfidat e saj, disa nga to tani i kemi zbutur e me disa jemi ballafaquar edhe si LDK, edhe si koalicion. Në Këshillin e Përgjithshme të LDK-së, është vendosur që LDK të marrë përgjegjësinë për ta drejtuar Qeverinë. Në LDK ka pasur zëra që e kanë kundërshtuar koalicionin, disa me AAK-në, e disa me PDK-në. Kundërshtimet e koalicionit janë vënë edhe duke shtrembëruar rugovizmin se çfarë do të bënte presidenti Rugova po të ishte gjallë. Është hera e parë që LDK e ka marrë përgjegjësinë për të qeverisur vendin dhe për këtë nuk është shumë e lehtë. Ne kemi shumë probleme për t’u ballafaquar dhe sfiduar me to, janë sfidat e zhvillimit ekonomik, papunësia, duhet të ballafaqohemi, kemi krimin e organizuar. Kosova po tregon shembullin më të mirë në luftën kundër ekstremizmit”, tha ai, raporton KP.

Ndërkaq Mustafa ka theksuar se Asociacioni i komunave serbe do të themelohet në harmoni me Kushtetutën e Kosovës.

Kryeministri është ndalur edhe te sistemi arsimor, duke thënë se cilësia e arsimit është sfida prioritare që ia kanë vënë vetës.