Edhe pse LDK-ja ende zyrtarisht nuk e ka nxjerrë një emër për ta sfiduar Shpend Ahmetin për të parin e Prishtinës në vjeshtë, Ismet Beqiri duket se i ka hyrë garës “krye në vete”, shkruan lajmi.net.

“Të dashur miq,tani përfunduam takimin me qytetare të fshatit Drenovc,anëtar dhe simpatizant të LDK-së. Bisedim i hapur dhe miqësor, për të gjitha çështjet, veçmas për kërkesat e tyre të arsyeshme dhe të drejta. Për Prishtinën tonë!”, ka shkruar sonte Beqiri në llogarinë e tij në Facebook.

Beqiri edhe ditëve tjerë ka pasur takime në disa zona në Prishtinës me qytetarë, duke e rritur kështu edhe më shumë mundësinë që ai të jetë kandidat për Prishtinën.

Deri me tash janë përmendur shumë emra nga partia e Isa Mustafës për Prishtinën, mirëpo zyrtarisht asnjë emër nuk është konfirmuar.

Arban Abrashi, Lumir Abdixhiku, Avdullah Hoti, Ismet Beqiri, etj., janë disa nga emrat që kanë qarkulluar në media që një kohë të gjatë si kandidat të mundshëm të LDK-së. /Lajmi.net/