OSBE-ja do të ketë rol të kufizuar në zgjedhjet lokale të 22 tetorit, pasi që do të përqendrohet në monitorimin e zgjedhjeve vetëm në komunat veriore të vendit. Kështu ka deklaruar shefja e KQZ-së, Valdete Daka, gjatë një interviste për gazetën “Zëri”, duke shtuar se në këto zgjedhje të drejtë vote kanë më pak se 1.9 milion qytetarë të Kosovës.

Ajo ka bërë të ditur se numri i votuesve, të cilët do të votojnë për herë të parë në zgjedhjet e tetorit është mbi 18 mijë, prej të cilëve 14 mijë janë votues të rinj, ndërsa rreth 4 mijë të tjerë që nuk kanë qenë në listën e votuesve te zgjedhjet e fundit parlamentare të mbajtura në vend më 11 qershor 2017.

“Komisioni Qendror i Zgjedhjeve është duke vazhduar me përgatitjet për organizimin e zgjedhjeve lokale të 22 tetorit. Mund t’ju them se shumë prej fazave të këtij procesi kanë përfunduar apo janë në përfundim dhe pritet përmbyllja e tyre”, ka thënë ajo.