Bora shkakton kaos në Evropë (Video)

Stuhi të forta bore dhe erëra të fuqishme kanë shkaktuar kaos në pjesën më të madhe të Europës qendrore e asaj lindore.

Bota

05/01/2017 09:21

Transporti është paralizuar e linjat e energjisë elektrike kanë rënë në disa rajone të Republikës Çeke, Austrisë e Polonisë.

Në Hungari, ulja e ndjeshme e temperaturave ka çuar në ngrirjen e lumit Tsza.

Sipas meteorologëve, gati gjysmë metri borë ka mbuluar zonat e ndodhura pranë maleve në Poloni, përcjell tch.

I ftohti i acartë pritet të zgjasë e pakta deri fundjavën tjetër. Një front aktiv të ftohti u afrua të mërkurën mbi qendrën dhe lindjen e Kontinentit të Vjetër, një lajm i mirë ky vetëm për resortet e skive në alpet veriore e ato lindore, që deri tani këtë dimër nuk kishin parë veçse shumë pak borë me sy.

Prej këtij fronti polar, termometri do të shënojë ulje të menjëhershme në Salzburg të Austrisë, Athinë të Greqisë e Minsk të Bjellorusisë. Ndërsa në pjesën veriore të Finlandës dhe Suedisë, temperaturat gjatë natës mund të bien deri në -40°C, ndërsa ditën llogaritet të shkojnë në -20°C.