Amerikani i bashkohet forcave kurde në Siri
Jordan Matson është shtetasi i SHBA-ve i cili ka vendosur t’i bashkohet radhëve të ushtarëve kurdë në luftë kundër IS-it në Siri.
Bota
Një qytetar amerikan i është bashkangjitur forcave kurde në Siri, për të luftuar kundër militantëve të Shtetit Islamik (IS), ka bërë të ditur një zëdhënës i një grupi më të madh të forcave kurde.
Ky zyrtar thotë se amerikani, Jordan Matson, i është bashkuar forcave kurde, me qëllim që të ndihmojë ata për t’i luftuar militantët e IS, të cilët ditët e fundit i kanë ashpërsuar sulmet e tyre në Siri.
Matson, po lufton në zonën Jazaa, qytet në veri-lindje të Sirisë, afër kufirit me Irakun, zonë shumë e sulmuar nga grupet militante.
Zyrtari kurd, ka thënë se për dy javët e fundit, janë vrarë 35 luftëtarë kurdë vetëm në Jazaa.
Në një agjenci të lajmeve kurde, është dërguar një video ku shihet amerikani, një djalë i ri, i buzëqeshur, që iu është bashkuar kurdëve.
Sipas faqes sociale Facebook të amerikanit, Matson, thuhet se ai është 28 vjeçar. /REL/