A u kalua Malisheva ilegalisht në regjionin e Gjakovës?!
Kryeministri Isa Mustafa, gjatë vizitës që sot i bëri Komunës së Malishevës, duke u përgjigjur në pakënaqësinë e qytetarëve të kësaj komune rreth kalimit në regjionin e Malishevës, tha se kjo ka ndodhur pa ndonjë vendim të qeverisë, dhe ka premtuar se do të merret me zgjidhjen e kësaj çështje.
Lajme
Në një njoftim për media të Komunës së Malishevës, pas takimit të kryetarit Ragip Begaj me kryeministrin Isa Mustafa, thuhet se aty është biseduar për çështje të ndryshme, përfshi edhe çështjen e kalimit në regjionin e Gajkovës, ku kryeministri Mustafa, tha se “kjo çështje nuk mund të zgjidhet jashtë vullnetit të qytetarëve dhe për këtë çështje nuk ka vendim të qeverisë”.
Kryetari Begaj duke folur për këtë temë i ka thënë kryeministrit se kalimi në regjionin e Gjakovës, ka nxitur reagime të qytetarëve. Ai i ka kërkuar kryeministrit që të merret personalisht, me këtë çështje, sepse sipas tij, nuk është pyetur askush dhe nuk dëshiron që nesër qytetarët, pakënaqësinë e tyre ta shprehin përmes formave të cilat nuk do ti dëshironte askush.
Për këtë çështje, kryeministri Mustafa, ka thënë se në qeveri nuk ka asnjë vendim për kalimin e Malishevës në regjionin e Gjakovës, mirëpo disa ministri, dhe disa sektore i kanë kaluar në kompetencë të regjionit të Gjakovës.
“Për këtë, unë ju them se kjo nuk mund të bëhet jashtë vullnetit të qytetarëve dhe do të angazhohem personalisht për zgjidhjen e këtij shqetësimi të qytetarëve të Komunës së Malishevës”, ka thënë Mustafa. Komuna e Malishevës, deri para se të kalohej në regjionin e Gjakovës, i përkiste regjionit të Prizrenit. (lajmi.net)