PDK ka qenë partia që ka fituar më së shumti zgjedhje nacionale në Kosovë, deri më 28 dhjetor të vitit të kaluar.

Këtë primat, Partia Demokratike nuk e humbi, ani se në votimet e kësaj dite triumfoi Vetëvendosje.

Në fakt, Albin Kurti arriti të barazojë numrin e “trofeve” që kishte arritur subjekti i Hashim Thaçit në garat e mëhershme elektorale. Vetëvendosje hipi në 4 fitore, sa i ka edhe PDK-ja.

Hera e tretë që VV doli e para ishte fitorja në zgjedhjet e 9 shkurtit të këtij viti. Triumfi i dytë i këtij subjekti qe ai në zgjedhjet nacionale të 14 shkurtit 2021. Rasti i parë kur Vetëvendosje fitoi një garë elektorale nacionale ishte triumfi “minimalist” më 6 tetor 2019, kur doli me krejt pak më tepër vota se LDK.

Në fakt, sipas një analize të proceseve elektorale edhe PDK është fituese e katërfishtë dhe e barabartë me VV. Herën e fundit kur Partia Demokratike i dominoi votimet ishte më 11 qershor 2017 duke qenë pjesë e koalicionit të madh PAN, bashkë me AAK-në dhe Nismën.

Para këtij procesi elektoral, partia e Hashim Thaçit kishte fituar edhe zgjedhjet e 8 qershorit 2014, ato të 12 dhjetorit 2010 dhe “zgjedhjet e pavarësisë” të 17 nëntorit 2007.

Fituesja me e “pakët” është LDK. Kjo parti ka triumfuar vetëm dy herë, dhe atë në zgjedhjet që u mbajtën sa ishe gjallë kryetari i saj i parë, Ibrahim Rugova. Ky i fitoi “befasishëm” votimet e para që u mbajtën në Kosovën e pasluftës, ato të 17 nëntorit të vitit 2001. Pa ndonjë problem të madh, Rugova i dominoi edhe të dytat, që u organizuan më 24 tetor 2004.