Tollovia në FFK, vjen reagimi zyrtar nga UEFA

13:44 | 9 Dhjetor 2019

UEFA ka reaguar pas konflikteve të fundit në FFK.

Arianit Ahmeti, i cili u shkarkua ditë më parë nga posti i Zëvendëssekretarit të Përgjithshëm në FFK për shkak se, siç tha Komiteti Ekzekutiv i FFK-së, ishte “vetëkandiduar për kryetar të FFK-së”, tashmë ka deklaruar se mandati katërvjeçar i presidentit të FFK-së, Agim Ademi, nuk është i rregullt.

Mirëpo FFK-ja ka publikuar një përgjigje të marrë nga UEFA, e që thotë se zgjedhja e Ademit është bërë në bazë të rregullave.

“Në lidhje me kërkesën tuaj të datës 2 dhjetor, 2019, mund të konfirmoj se unë personalisht kam marrë pjesë në Kuvendin e Përgjithshëm të Jashtëzakonshëm Zgjedhor të FFK-së më 6 korrik, 2018, dhe se, me këtë rast, z. Agim Ademi u zgjodh me aklamacion president i ri i FFK-së me mandat katërvjeçar”, thuhet në përgjigjen e Thierry Favre, Shef i Zhvillimit të Federatave Nacionale/Zëvendësshef i Divizionit të Federatave Nacionale.

FFK-ja ka publikuar edhe procesverbalin nga mbledhja e Kuvendit të Jashtëzakonshëm Zgjedhor, ku thotë se konfirmohet mandati katërvjeçar i presidentit Agim Ademi si dhe interpretimin ligjor të Ministrisë së Administratës Publike, që, sipas FFK-së, është organi i vetëm për të interpretuar statusin e OJQ-ve.