Një grabitje e armatosur ka ndodhur mëngjesin e sotëm në Shupkovc të Mitrovicës.

Persona të panjohur dhe të maskuar kanë hyrë në lokacion e një prej pompave të derivateve që ndodhet në këtë vend.

Nën kërcënimin e armës të njëjtët kanë arritur që të grabisin pazarin ditor nga arka.

Rasti është konfirmuar nga zëdhënësi i policisë për rajonin e Mitrovicës së jugut, Avni Zahiti.

“Me datën 17 janar 2025, , rreth orës 04:15, Policia ka pranuar informatën se në një pompë te derivateve në fshatin Shupkovc të Mitrovicës, ka ndodhur një grabitje. Bazuar në informatat dhe hetimet fillestare, dyshohet se dy persona të maskuar nën kërcënimin e armës kanë grabitur një shumë të parave dhe kanë ikur në drejtim të panjohur”, ka thënë Zahiti.

Ai tha gjithashtu se njësitë policore janë duke ndërmarrë veprimet hetimore në drejtim të identifikimit të personave të dyshuar dhe mbledhjen e provave relevante në lidhje me këtë rast./Lajmi.net/