Sipas raportit të Institutit të Psikiatrisë Forenzike, Murseli nuk vuan nga asnjë çrregullim apo sëmundje mendore dhe është i aftë të përballet me procesin gjyqësor.

Lidhur me këtë raport, ka folur edhe Leotrim Syla, avokat i familjes Ademaj, në emisionin “Kosova Today” në Klan Kosova.

Ai tha se ky rezultat ka sjellë një ndjenjë lehtësimi pas javësh të tëra pritjeje dhe ankthi.

“Ndihem shumë i lehtësuar. Ky raport ka qenë në pritje për më shumë se katër javë që nga momenti kur gjykata mori vendim për ekzaminimin psikiatrik të Naimit. Edhe familja e Liridonës ka qenë nën një stres të vazhdueshëm”,  u shpreh Syla.

Ai shtoi se përmes raportit, Murseli ka tentuar ta justifikojë veprën duke u thirrur në të kaluarën e tij si fëmijë, por sipas avokatit, ky fakt nuk e ndryshon përgjegjësinë ligjore dhe morale për veprën e rëndë që i ngarkohet.