Sindikata e Punëtorëve të RTK-së paralajmëron protesta më 6 gusht nëse nuk bëhet alokimi i mjeteve financiare

Lajme

25/07/2025 10:25

Sindikata e Punëtorëve të Radio Televizionit të Kosovës (SPERTK) i ka bërë sot thirrje të drejtpërdrejtë Qeverisë së Kosovës që të realizojë urgjentisht ndarjen e mjeteve financiare për RTK-në, në përputhje me buxhetin e miratuar nga Kuvendi. Në të kundërtën, Sindikata paralajmëron fillimin e protestave më 6 gusht.

Në komunikatën e publikuar, SPERTK thekson se RTK ndodhet në një situatë alarmante financiare dhe se çdo vonesë shtesë rrezikon funksionimin e transmetuesit publik dhe cenon të drejtën për pagesë të mbi qindra punëtorëve. Sipas tyre, ekzistojnë zgjidhje ligjore të qarta për të parandaluar kolapsin institucional të RTK-së, ndërkohë që mosveprimi përbën edhe shkelje ligjore, transmeton lajmi.net

“RTK nuk është barrë për shtetin – ajo është një aset shtetëror i pazëvendësueshëm që kontribuon në informimin e drejtë të qytetarëve, përfaqësimin e të gjitha komuniteteve dhe forcimin e demokracisë në vend,” thuhet në reagimin e Sindikatës.

SPERTK njofton se, nëse deri më 5 gusht nuk realizohet alokimi i mjeteve, jo vetëm që do të nisin protestat, por do të pezullohet mbulimi i çdo aktiviteti politik nga RTK dhe do të ndërmerren edhe hapa ligjorë ndaj personave përgjegjës.

Komunikata e plotë:

Nëse nuk ka alokim të mjeteve, protestat nisin më 6 gusht

Sindikata e Punëtorëve të Radio Televizionit të Kosovës (SPERTK) i bën thirrje të drejtpërdrejtë Qeverisë së Republikës së Kosovës që të ndërmarrë menjëherë hapat e nevojshëm për ndarjen e mjeteve financiare për RTK-në, në përputhje me buxhetin e miratuar me ligj nga Kuvendi i Kosovës.

Ekzistojnë zgjidhje të plota ligjore për të siguruar funksionimin e transmetuesit publik dhe për të parandaluar kolapsin institucional të RTK-së, e cila tashmë ndodhet në një gjendje alarmante financiare. Çdo vonesë shtesë rrezikon jo vetëm misionin kushtetues të RTK-së, por edhe mundësinë që qindra punëtorë të mbesin pa paga, duke i ekspozuar ata dhe familjet e tyre ndaj pasigurive serioze sociale.

RTK nuk ka qenë dhe nuk është barrë për shtetin – ajo është një aset shtetëror i pazëvendësueshëm që kontribuon në informimin e drejtë të qytetarëve, përfaqësimin e të gjitha komuniteteve dhe forcimin e demokracisë në vend. Mospërmbushja e obligimeve financiare ndaj RTK-së përbën një shkelje të drejtpërdrejtë të ligjit dhe rrezikon funksionimin e vet të transmetuesit të vetëm publik në Kosovë.

SPERTK u bën thirrje të gjitha institucioneve shtetërore që të trajtojnë kërkesat tona legjitime dhe të mbështetura në bazë ligjore.

Kërkojmë që RTK të trajtohet me ligjshmëri, përgjegjësi dhe meritokraci – ashtu siç i takon një institucioni që i shërben interesit publik dhe qytetarëve të të gjitha komuniteteve në Republikën e Kosovës.

Nëse deri më 5 gusht nuk bëhet alokimi i mjeteve financiare për RTK-në, Sindikata do të nisë protestat e paralajmëruara. Njëkohësisht, SPERTK do të kërkojë që të pezullohet mbulimi i çdo aktiviteti politik nga RTK dhe do të ndërmarrë hapa ligjorë përmes padive në gjykatë ndaj të gjithë përgjegjësve për situatën e krijuar.

SPERTK mbetet e vendosur në mbrojtjen e të drejtave të punëtorëve dhe misionit të transmetuesit publik.

Me respekt,

Kryesia e Sindikatës së Punëtorëve të RTK-së (SPERTK-së)./lajmi.net/