Dardanët do të kenë ndeshjet ndaj Qipros, Greqisë dhe Irlandës së Veriut gjatë muajit qershor, shkruan lajmi.net.

Për këto ndeshje, Alain Giresse ka publikuar listën me emrat që i ka ftuar në grumbullim. Aty vërehen disa ndryshime.

Emri që tërheq vëmendje të madhe është ai i Benjamin Kolollit, i cili është kthyer në listë. Larg vëmendjes në Superligën e Japonisë, por disi gjeti rrugën për t’u kthyer në listë.

Njësoj nuk ndodhi me Leart Paqaradën, i cili këtë sezon ishte spektakolar me skuadrën e St.Pauli në Bundesligën e dytë.

Jashtë mbeti edhe Elbasan Rashani që bëri mirë me skuadrën e Clermont, por edhe Florent Hadërgjonaj. Të dy këta të fundit ishin aktiv në fundjavë.

Emrat e rinj në listën e Kosovës janë Edvin Kurtulus, i cili deri më tani luante me U21, por ka bërë mirë me Hammarby. Po ashtu, Emir Sahiti ka pranuar përsëri ftesë. Për të mund të jetë grumbullimi i parë, pasi herën e kaluar që u ftua, u tërhoq si i lënduar. Risi është edhe Donat Rrudhani.

Jashtë listës mbeti edhe Astrit Selmani që në grumbullimin e kaluar gjeti golin. Ai ngeci pak në formën e tij te skuadra e Hammarby dhe nuk ka pasur momentet më të mira as në klub.

Përsëri mungon Bersant Celina, i cili duket se në nivelin ku po aktivizohet, edhe nëse bën paraqitje të mira në aspektin individual, vështirë se do ta bind dikë për ftesë. /Lajmi.net/