Çmimet e prodhimit në Kosovë kanë shënuar rritje të ndjeshme gjatë tremujorit të dytë të vitit 2025, me energjinë elektrike që ka udhëhequr këtë trend në mënyrë dominuese.

Sipas të dhënave të fundit nga Agjencia e Statistikave të Kosovës (ASK), indeksi i përgjithshëm i çmimeve të prodhimit është rritur për 4,1% në TM2 2025 krahasuar me TM1 2025. Ndërkohë, në krahasim me të njëjtën periudhë të vitit të kaluar (TM2 2024), çmimet janë rritur në një mesatare prej 11,3%, transmeton lajmi.net

Energjia elektrike, rritja më e lartë mes të gjitha sektorëve

Rritjen më të theksuar e ka pasur sektori i energjisë elektrike, gazit, avullit dhe furnizimit me ajër të kondicionuar, i cili ka shënuar një rritje prej 16,7% vetëm brenda një tremujori. Kur krahasohet me tremujorin e njëjtë të vitit të kaluar, ky sektor ka pësuar një rritje të jashtëzakonshme prej 39,7%, duke ndikuar dukshëm në çmimet e përgjithshme të prodhimit.

Kjo rritje nënvizon presionin e vazhdueshëm që sektori energjetik po ushtron mbi industrinë dhe ekonominë e vendit në tërësi, në një kohë kur shumë biznese përballen me sfida të qëndrueshmërisë.

Sektorët e tjerë me rritje dhe rënie çmimesh

Përveç energjisë elektrike, rritje të çmimeve janë regjistruar edhe në:

Shtypjen dhe riprodhimin e mediave të incizuara (+9,3%)

Prodhimin e veshjeve (+6,7%)

Prodhimin e mjeteve motorike dhe rimorkiove (+4,2%)

Ndërkohë, disa sektorë kanë regjistruar ulje të çmimeve, përfshirë:

Prodhimin e metaleve (-4,7%)

Grumbullimin dhe trajtimin e mbeturinave (-3,5%)

Prodhimin e pijeve (-0,9%)

ASK ka publikuar gjithashtu të dhënat për indeksin e çmimeve të prodhimit (IÇP) për periudhën Tremujori i parë 2021 – Tremujori i dytë 2025, me vitin bazë 2021 = 100, që pasqyron qartë tendencën në rritje të çmimeve përgjatë këtyre viteve./lajmi.net/