Pullë postare për Komitetin Olimpik të Kosovës
Posta e Kosovës ka emetuar një pullë postare në shenjë nderimi për njohjen e Komitetit Olimpik të Kosovës (KOK) nga Komiteti Olimpik Ndërkombëtar (KON).
Lajme
Me këtë rast, kryeshefi ekzekutiv i Postës, Sejdi Hoxha dhe zyrtarë të tjerë kanë pritur presidentin e KOK-ut, Besim Hasani, nënkryetarin Fatmir Makolli dhe anëtarin e Bordit të KOK-ut, Ramadan Selimi.
Kryeshefi i Postës ka prezantuar në këtë takim pullën e re postare dhe ka përgëzuar udhëheqësit e KOK-ut për suksesin e arritur në njohjen ndërkombëtare të sportit kosovar.
Javën e ardhshme, në Monako, pritet njohja e plotë e Komitetit Olimpik të Kosovës nga Bordi Ekzekutiv i KON-it.
Komiteti Olimpik i Kosovës është themeluar në vitin 1992 dhe ka më shumë se 30 federata kombëtare.
Posta e Kosovës edhe në të ardhmen do të nderojë dhe promovojë, përmes pullave postare, të arriturat në sportin kosovar.