Qytetarë të disa komunave të Kosovës kanë dalë dje në protesta kundër aktgjykimit të shkallës së parë të Dhomave të Specializuara në Hagë ndaj ish-krerëve të UÇK-së.

Protestat u organizuan nga Organizata e Veteranëve të Luftës së UÇK-së, në qytetet ku kjo organizatë ka degë dhe struktura. Pavarësisht motit me shi, në tubime morën pjesë veteranë, familjarë dhe qytetarë, transmeton lajmi.net.

Pjesëmarrësit shprehën kundërshtimin e tyre ndaj aktgjykimit për Hashim Thaçin, Kadri Veselin, Rexhep Selimin dhe Jakup Krasniqin. Tubimet u zhvilluan nën moton “Jo në emrin tim”.

Në Prishtinë, protesta ka hyrë tashmë në natën e 11-të. Tubimi i së premtes nisi në orën 21:00 dhe në të morën pjesë edhe familjarë të ish-krerëve të UÇK-së, si dhe përfaqësues të jetës politike e publike.

Protesta në kryeqytet pritet të vazhdojë edhe sonte, duke nisur sërish në orën 21:00. Organizatorët dhe pjesëmarrësit synojnë të vazhdojnë shprehjen e kundërshtimit ndaj aktgjykimit të Dhomave të Specializuara në Hagë./lajmi.net/