Interi e ka fituar ndeshjen e parë gjysmëfinale kundër Milanit në Ligën e Kampionëve.

“Nerazzurrët” triumfuan me rezultat të pastër 0:2 kundër “Rossonerëve” në stadiumin “San Siro”.

Trajneri i Milanit, Stefano Pioli pas ndeshjes pranoi se Interi ishte skuadër më e mirë në fushë dhe shtoi se futbollistët e tij janë të zhgënjyer me rezultatin.

“Ky është një term i ashpër,” i tha Pioli Amazon Prime Italia kur iu sugjerua se Milani dukej i panjohur, transmeton lajmi.net.

“Fakti është se Interi luajti më mirë në pjesën e parë dhe shënoi dy gola, Milani luajti më mirë në pjesën e dytë dhe nuk shënoi. Ky është futbolli në këtë nivel. Interi kishte më shumë cilësi dhe ishte më efikas në pjesën e parë, ndërsa ne bëmë shumë gabime për këtë pjesë”.

“Deri në minutën e shtatë, Interi nuk kishte hyrë asnjëherë në zonën tonë të penalltisë dhe më pas shënoi në këndin e parë. Është e qartë se duhet të ishim më të përqendruar. Ne donim një rezultat ndryshe, por duhet të vazhdojmë të besojmë”.

“Ne synonim të ishim kompakt, intensiv dhe agresiv, por Interi kishte më të mirën në shumë situata 50-50 dhe kjo i ndihmoi ata të merrnin kontrollin e lojës. Ata gjithashtu bënë mirë që i konvertuan ato dy raste të hershme, gjë që na e bëri të vështirë në nivel taktik dhe mendor. Unë pashë një reagim të fortë dhe kjo është ajo që duhet të ndërtojmë për ndeshjen e ardhshme”.

“Ne patëm shanset në pjesën e dytë, kështu që natyrisht në ndeshjen e dytë na duhet më shumë cilësi dhe një qëndrim më agresiv. Duhet të ngremë shiritin dhe të luajmë nga fillimi me diçka shumë më afër paraqitjes së pjesës së dytë”.

“Djemtë e dinë mirë se kjo nuk ishte performanca apo rezultati që dëshironim, ata janë të zhgënjyer, por e dinë që ne kemi ende një shans për ta kthyer atë”, deklaroi ai.

Ndeshja e dytë ndërmjet dy rivalëve të përbetuar lokal luhet javën e ardhshme, gjithashtu në stadiumin “San Siro”.

Ekipi që shkon në finale do të përballet me fituesin e ndeshjes tjetër Manchester City – Real Madrid./Lajmi.net/