Jose Mourinho ka kërkuar që Chelsea të sigurojë kualifikimin për në fazën eliminatore të Ligës së Kampionëve duke mposhtur Baselin në Zvicër të martën.

Menaxheri portugez është i vetëdijshëm për orarin e ngjeshur dhe të vështirë të skuadrës së tij gjatë muajit dhjetor, dhe dëshiron ta mbyllë çështjen e kualifikimit nga Grupi E, para se të takohen me Steaua Bukureshtin në muajin e ardhshëm.

“Ne kemi shumë ndeshje në dhjetor dhe nëse mund ta kemi një më pak – dueli me Steauan – do të na ndihmojë shumë”, deklaroi Mourinho.

“Po ashtu, sepse nuk ishte ndjenjë e mirë të humbim nga ata në shtëpi andaj të luftojmë për të mposhtur një skuadër që na mposhti në Stamford Bridge, mendoj se është e rëndësishme”, shtoi ai.

Orari i Chelseas në dhjetor përfshinë nëntë ndeshje, në mesin e të cilave ballafaqime të rëndësishme në Premierligë kundër Southamptonit, Arsenalit dhe Liverpoolit.