Ora 14:00 ishte paraparë që ti bëjë bashkë partnerët e koalicionit qeverisës.

Por, një takim i tillë nuk ndodhi.

Kryeministri Avdullah Hoti, kryetari i AAK-së Ramush Haradinaj dhe i NISMËS, Fatmir Limaj, nuk u panë me njeri tjetrin.

T7 gjatë ditës ka kërkuar sqarime nga Zyra e Kryeministrit, se pse është anuluar ky takim.

Por, asnjë sqarim nga ky institucion nuk është dhënë.

Ndërkohë, për këtë çështje gjatë ditës ka folur kreu i AAK-së, Ramush Haradinaj.

Ai ka thënë se një takim i tillë pritet të ndodh të hënën.

Ndërsa sipas tij, aty do të diskutohet vetëm për përgatitjet që duhet të bëhen për takimin e dy shtatorit në Uashington.

Pos kësaj Haradinaj ka folur edhe më konkretisht për takimin që do të ndërmjetësohet nga Robert Obrien, që është këshilltar për siguri i presidentit Donald Trump.

Sipas tij, ky takim duhet të shfrytëzohet edhe për një marrëveshje finale.

Me dy shtator në Uashington do të takohen kryeministri i Kosovës, Avdullah Hoti dhe presidenti i Serbisë, Aleksandër Vuçiq.

Për këtë takim ka njoftuar i dërguari special i presidentit Trump, për dialogun Kosovë – Serbi, Richard Grenell.