Presidenti i FIFA’s, Sepp Blatter ka bërë parashikimin e tij se kush mund të fitojë Kampionatin botëror 2014.

Edhe pse nuk përmendi një emër të posaçëm, kreu i Federatës botërore të futbollit është i bindur se në Brazil në verë do të triumfojë një skuadër nga Amerika e Jugut.

“Është e qartë se kur luajnë në regjionin e tyre, të gjitha skuadrat nga Amerika e Jugut duan të fitojnë, jo vetëm Brazili dhe Argjentina”, deklaroi Blatter.

“Edhe Kili, Uruguai e Kolumbia, janë skuadra shumë të forta, kanë shanset e tyre”. Zvicerani është i bindur me mendimin e tij se kampioni i ardhshëm botëror do të jetë një shtet nga Amerika e Jugut.

“Pse? Sepse këto shtete do të bëjnë çmos që të përkujdesen që një ekip nga Evropa të mos triumfojë në Brazil”. Mirëpo, me mendimin e Blatterit mund të mos pajtohen skuadra të fuqishme si Spanja ose Gjermania.